LIVE TV
മോഹൻലാലിന്റെ ജന്മദിനത്തിന് ആരാധകർ വിവിധ രീതികളിലുള്ള സമ്മാനങ്ങളും ഹൃദ്യമായ ആശംസകളും അറിയിക്കാറുണ്ട്. അക്കൂട്ടത്തിൽ ചിലതെല്ലാം മോഹൻലാലിന്റെ ശ്രദ്ധയും നേടാറുണ്ട്. അങ്ങനെ മോഹൻലാലിന്റെ സ്നേഹം നേടിയിരിക്കുകയാണ് ഗായിക സോണി മോഹനും കൂട്ടുകാരും ചേർന്ന് ആലപിച്ച ഒരു കവർ സോങ്.
മോഹൻലാലിന്റെ ചില ഹിറ്റ് പാട്ടുകൾ ചേർത്തുവെച്ച് പാടികൊണ്ടാണ് സോണിയും കൂട്ടുകാരും വീഡിയോ ചെയ്തത്. വിവിധ പാട്ടുകളിലൂടെ കടന്നുപോകുന്ന ഈ വീഡിയോ സോഷ്യൽ മീഡിയയിൽ വൈറലായിരുന്നു. പാട്ട് വൈകാതെ മോഹൻലാലിന്റെ കാതിലും എത്തി. സോണിയ്ക്ക് നന്ദിയും സ്നേഹവും അറിയിച്ചുകൊണ്ട് മോഹൻലാൽ വോയ്സ് മെസേജ് അയക്കുകയും ചെയ്തു.
'സോണിയ്ക്കും ഫ്രണ്ട്സിനും എന്റെ വക വലിയൊരു താങ്ക്സ്. ആ പാട്ടിന് നന്ദി,' എന്നാണ് മോഹൻലാൽ വോയ്സ് മെസേജിൽ പറയുന്നത്. സോണി ഇത് സോഷ്യൽ മീഡിയയിൽ പങ്കുവെച്ചിട്ടുണ്ട്. വാക്കുകൾകൊണ്ട് വർണിക്കാനാകാത്ത ചില നിമിഷങ്ങൾ നമ്മുടെ ജീവിതത്തിൽ ഉണ്ടാകുമെന്നും അത്തരമൊരു നിമിഷമാണ് ലാലേട്ടന്റെ മെസേജ് എന്നാണ് സോണി കുറിച്ചിരിക്കുന്നത്. ജീവിതത്തിൽ ഒരിക്കലും മറക്കാനാകാത്ത ദിവസം സമ്മാനിച്ചതിന് ഇവർ മോഹൻലാലിന് നന്ദിയും അറിയിച്ചിട്ടുണ്ട്.
അതേസമയം, മോഹൻലാലിന്റെ ജന്മദിനത്തിൽ റീലിസായ ദൃശ്യം 3 വലിയ വിജയമാണ് നേടുന്നത്. ചിത്രത്തിന്റെ ആദ്യ ഷോയ്ക്ക് എറണാകുളം കവിത തിയേറ്ററിൽ മോഹൻലാലും സിനിമയുടെ അണിയറ പ്രവർത്തകരും കഴിഞ്ഞ ദിവസം എത്തിച്ചേർന്നിരുന്നു. ഇവിടെ വെച്ച് മോഹൻലാൽ ആരാധകർക്കൊപ്പം ജന്മദിനം കേക്ക് മുറിച്ച് ആഘോഷിക്കുകയും ചെയ്തു. ജീവിതത്തിൽ ഒരിക്കൽ മാത്രം സംഭവിക്കുന്ന അതിമനോഹരമായ ജന്മദിനാഘോഷം എന്നാണ് ചിത്രത്തിന്റെ വിജയം കൂടി ആഘോഷിച്ചുകൊണ്ട് മോഹൻലാൽ പറഞ്ഞത്.
Content Highlights: Mohanlal thanks young singers for a birthday special cover song and makes them happy with a voice message
